2025-nji ýylyň 13-nji maýynda Türkmenistanyň Awstriýa Respublikasyndaky Adatdan daşary we Doly ygtyýarly Ilçisi Hemra Amannazarow Wenadaky Awstriýa parlamentinde çykyş etdi. Çykyşynda Ilçi Türkmenistanda bolup geçen syýasy we durmuş-ykdysady ösüşler barada durup geçdi we ýurt ýolbaşçylarynyň demokratik institutlary berkitmek, inklýuziw dolandyryşy ösdürmek we durnukly ykdysady ösüşe ýardam bermek baradaky başlangyçlaryna we tagallalaryna ünsi çekdi.
Sebitleýin hyzmatdaşlygy, hususan-da Merkezi Aziýa - Ýewropa Bileleşiginiň hyzmatdaşlygynyň çäklerinde ösdürmäge aýratyn üns berildi. Ilçi Türkmenistanyň bu formatdaky işjeň orny, şol sanda 2025-nji ýylyň 27-nji martynda Aşgabatda geçirilen Ýewropa Bileleşigi - Merkezi Aziýa 20-nji ministrler duşuşygynyň üstünlikli geçirilmegi barada çykyş etdi. Duşuşykda sebitleriň arasynda gepleşikleri, arabaglanyşygy we bilelikdäki başlangyçlary giňeltmäge bolan umumy gyzyklanma tassyklanyldy.
Bu çäre sebitleýin arabaglanyşyk, ykdysady gatnaşyklary pugtalandyrmak we syýasy hyzmatdaşlygy çuňlaşdyrmak meseleleri boýunça pikir alyşmak üçin konstruktiw platforma bolup hyzmat etdi. Awstriýanyň parlament agzalary bu pikirleri goldadylar hem-de Türkmenistan we Merkezi Aziýanyň beýleki ýurtlary bilen geljekde parlamentara hyzmatdaşlygy has-da berkitmäge taýýardyklaryny mälim etdiler.
