2025-nji ýylyň 6-njy awgustynda «Awaza» milli syýahatçylyk zolagynda Türkmenistanyň Daşary işler ministri Raşid Meredow bilen Awstriýa Respublikasynyň Ýewropa we halkara işler boýunça federal ministrliginiň Döwlet sekretary Jozef Şellhornyň arasynda duşuşyk geçirildi.
Taraplar özara gyzyklanma bildirilýän meseleleriň giň toplumyny, hususan-da syýasy-diplomatik we söwda-ykdysady ugurlardaky hyzmatdaşlygy ara alyp maslahatlaşdylar.
Diplomatlar iki ýurduň daşary syýasatynyň esasyny düzýän bitaraplygyň aýratyn ähmiýetini we netijeliligini bellediler. Şu nukdaýnazardan, şu ýyl Awstriýanyň we Türkmenistanyň Bitaraplygynyň 70 we 30 ýyllygynyň ýubileý senelerine gabat gelendigi nygtaldy.
Diplomatlar deňze çykalgasy bolmadyk ýurtlaryň ýüzbe-ýüz bolýan meselelerini ara alyp maslahatlaşdylar. Şunuň bilen baglylykda, 2014-nji ýylda BMG-niň Deňze çykalgasy bolmadyk ösüp barýan döwletler boýunça ikinji maslahatynyň Awstriýada geçirilendigi bellenildi.
Mundan başga-da, taraplar halkara gün tertibiniň möhüm meseleleri boýunça pikir alyşdylar.
