Aşgabatda Palestina Döwletiniň Ilçihanasynyň açylyş dabarasy geçirildi

2016-njy ýylyň 15-nji noýabrynda Aşgabatda Palestina Döwletiniň Türkmenistandaky Ilçihanasynyň resmi açylyş dabarasy geçirildi. Açylyş dabarasyna iki ýurduň Daşary işler ministrleri gatnaşdylar. Açylyş dabarasy Palestina Döwletiniň Prezidenti Mahmud Abbasyň Türkmenistana resmi saparynyň çäginde geçirildi.

  Dabaraly çärede bellenilişi ýaly, şu waka hem-de ýokary derejede geçirilen gepleşikleriň netijeleri boýunça gol çekilen ikitaraplaýyn resminamalar iki ýurduň hem uzakmöhletleýin esasda özara bähbitli hyzmatdaşlygy giňeltmäge çalyşýandygyna şaýatlyk edýär.

  14-nji noýabrda geçirilen ýokary derejedäki gepleşikleriň barşynda Türkmenistanyň Prezidenti Gurbanguly Berdimuhamedow palestinaly kärdeşini türkmen tarapynyň doganlyk ýurduň diplomatik wekilhanasynyň netijeli işlemegi üçin ähli zerur şertleri döretjekdigine ynandyrdy.