2025-nji ýylyň 12-nji dekabrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Ykdysady Hyzmatdaşlyk Guramasynyň Baş sekretary Asad Majid Han bilen duşuşdy.
Myhman duşuşmaga döredilen mümkinçilik üçin hoşallyk bildirip, Halkara parahatçylyk we ynanyşmak ýylyna, Halkara Bitaraplyk gününe we Türkmenistanyň hemişelik Bitaraplygynyň 30 ýyllygyna bagyşlanan halkara forumyň möhüm ähmiýetini belledi.
Türkmen halkynyň Milli Lideri Ykdysady Hyzmatdaşlyk Guramasynyň Baş sekretaryny myhmansöýer türkmen topragynda mähirli mübärekläp, ýurdumyzyň bu çärä ählumumy gün tertibiniň wajyp meselelerini ara alyp maslahatlaşmak üçin ýokary derejeli syýasy waka hökmünde garaýandygyny aýtdy.
Duşuşygyň dowamynda bellenilişi ýaly, YHG bilen hyzmatdaşlyk Türkmenistanyň daşary syýasatynyň esasy ugurlarynyň biridir. Köp ýyllaryň dowamynda bu abraýly gurama bilen hyzmatdaşlyk etmegiň oňyn tejribesi toplandy.
Şu ýylyň aprelinde Arkadag şäherinde Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumy geçirildi. Şunuň bilen baglylykda, Türkmenistanyň Halk Maslahatynyň Başlygy bu forumyň sebitleýin ykdysady hyzmatdaşlygy ösdürmäge, özara bähbitli gatnaşyklary giňeltmäge, Durnukly ösüş maksatlaryny durmuşa geçirmäge uly goşant goşandygyna ynam bildirdi.
Türkmenistan YHG-nyň çäklerinde öňe sürülýän başlangyçlary goldap, özara bähbitli taslamalary amala aşyrmaga işjeň gatnaşýar diýip, Milli Liderimiz aýtdy we bu gurama agza döwletler bilen söwda-ykdysady, energetika, ulag, ekologiýa, syýahatçylyk, medeniýet ýaly ugurlarda netijeli hyzmatdaşlygy ösdürmek üçin giň mümkinçilikleriň bardygyny belledi.
Türkmen halkynyň Milli Lideri tebigy gazyň baý gorlaryna eýe bolan Türkmenistanyň uglewodorod serişdeleriniň eksportyny diwersifikasiýalaşdyrmaga, şol sanda Ykdysady Hyzmatdaşlyk Guramasyna agza döwletler bilen bu ugurda hyzmatdaşlygy giňeltmäge taýýardygyny tassyklady.
Şunuň bilen birlikde, ýurdumyzyň geografik taýdan amatly ýerleşmeginiň ulag-logistika ulgamyny ösdürmäge berk esas bolup hyzmat edýändigi aýdylyp, Türkmenistanyň üstaşyr ulag geçelgelerini döretmek boýunça amala aşyrylýan taslamalara gatnaşmak babatda YHG-nyň anyk tekliplerine seretmäge taýýardygy nygtaldy.
Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Ykdysady Hyzmatdaşlyk Guramasynyň Baş sekretary Asad Majid Han birek-birege iň gowy arzuwlaryny beýan etdiler.
